О, Пречистая Госпоже Богородице, Мати Боголюбивая, надежде нашего спасения! Воззри милостиво на предстоящыя с верою и любовию и поклоняющыяся Пречистому Образу Твоему: приими наше хвалебное пение сие и пролей теплую Твою молитву о нас грешных ко Господу, да, презрев все наши согрешения, спасет и помилует нас! О, Предивная Владычице! Покажи на нас чудные милости Твоя. Молим тя умиленно, избави нас от всякие скорби, настави на путь всякие добродетели и благостыни, спаси от искушений, бед и болезней, изми от нас оклеветания и ссоры; сохрани от молниеносного грома, от запаления огненного, от града, гнуса, потопа и смертоносныя язвы; подай нам свою милостивую помощь на пути в море и на суше, да не погибнем люте. О, Всемилостивая, боголюбивая Мати, с твердым упованием воссылаем к Тебе нашу смиренную молитву! Не отрини наших слез и воздыханий, не забуди нас во вся дни живота нашего, но всегда пребывай с нами, и Твоим заступлением и ходатайством у Господа подаждь нам отраду, утешение, защиту и помощь, да выну славим и величаем Преблагословенное и всепетое Имя Твое. Аминь.